Вистинските возбудувања на Европското првенство започнуваат од денес. Со дуелот Швајцарија - Полска од 15 часот стартува елиминационата фаза.
Од 18 часот се игра островскиот дуел помеѓу Велс и Северна Ирска. Велшаните предводени од Герет Бејл се фаворити во овој дуел, но Северна Ирска покажа дека не смее да се потцени.
Шлагот на денот е од 21 часот кога играат Хрватска и Португалија. Хрватите се репрезентацијата која најмногу импресионираше во досегашниот дел од шампионатот и цели далеку на Европското првенство. Португалија со три нерешени средби успеа да се пласира во осминафиналето. Роналдо и другарите разочараа, но јасно е дека оваа селекција поседува квалитет па се очекува неизвесен дуел со Хрватска.
Утрешниот ден започнува со Франција и Република Ирска. Ирците бараат одмазда за раката на Тиери Анри која уште ги прогонува од бараж пресметката, но домаќинот е голем фаворит и доколку не победи би било огромно изненадување.
Изненадување би било и доколку Германија доживее елиминација против Словачка, а и Белгија е јасен фаворит во дуелот со Унгарија.
Најинтересниот натпревар се игра во понеделник, реприза од минатото финале помеѓу Италија и Шпанија. Со прикажаното по средбите од групната фаза се очекува неизвесен дуел. Шпанија има подобра селекција, но Италијаните покажаа карактер, организираност, голема желба за победа, така ќе биде и во понеделник.
Осминафиналната фаза се комплетира со дуелот помеѓу Англија и Исланд. Исланѓаните се можеби најсимпатичната селекција на ова Европското првенство, но се чини дека нивниот пат на шампионатот ќе заврши во осминафиналето.