Вардар има нерешен резултат од 1-1 по првото полувреме на мечот против Розенборг на домашен терен, во рамките на шестото, последно коло од групата „Л“ во Лига Европа.

Црвено-црните добро го почнаа мечот, а голот дојде во 9. минута, најнапред Николов испрати топка кон казнениот простор на гостите, истата ја прифати Итало кој одлично се загради и ја смести во голот на Розенборг.

Итало можеше да го дуплира водството на нашиот претставник во 23. минута, по една брза и убава полуконтра, Бразилецот сепак не погоди по асистенцијата на Николов од страна, а гостите се спасуваа. Веднаш по ова, од корнер Новак биеше прецизно со глава, но неговиот обид со крајни напори голманот на Розенборг го расчисти а топката притоа удри и во дирекот.

Повторно Бразилецот имаше прилика, овој пат во 27. минута, но неговиот удар повторно го намачи Хансен кој за негова среќа ја расчисти и оваа опасност кон неговиот гол.

Во продолжението од мечот до крајот на полувремето, избраниците на Чеде Јаневски за жал не го сочуваа водството, а израмнувачкиот гол дојде по грешка на Барсегјан кој сакаше да врати назад, на таа топка налета Адегбенро.

Гачевски го „сруши“ Нигериецот а главниот арбитар оправдано покажа на белата точка, од која сигурен реализатор беше Никлас Бендтнер.

Вардар: Гачевски, Демири, Новак, Грнчаров, Муслиу, Николов, Глигоров, Блажевски, Фелипе, Барсегјан и Итало.

Мечот на „Националната Арена Филип Втори“ во Скопје го суди украинскиот арбитар Серхи Боико.