Динамо Загреб полека но сигурно се враќа на врвот во хрватскиот фудбал, по едногодишна пауза хрватскиот гигант е прв на табелата по 16 одиграни кола во тамошниот прволигашки шампионат, и веќе има предност од цели 12 бода во однос на Хајдук и Осијек.

Најновата победа од 2-0 над Локомотива Загреб вчера не е тема низ медиумите во Хрватска, туку нешто сосема друго.

Се шпекулира дека на нашиот репрезентативец и член на Динамо Загреб, Аријан Адеми не му било јасно тоа што „преку ноќ“ станал капитен на тимот, познато е дека тој со Домагој Антолиќ се големи пријатели, а Марио Цвитановиќ направи потег кој се чини дека никој не го разбира во Хрватска.

„Нова глупост на Цвитановиќ: Само во Динамо не се знае кој е капитен, а ниту Адеми не му е јасно што се случи...“ пишува хрватското издание на специјализираниот фудбалски портал „Гол“ во својот наслов.

„Аријан Адеми е еден од лидерите во соблекувалната и вистинско решение за капитен на тимот, но Догамој Антолиќ не заслужи преку ноќ да ја загуби капитенската лента, тоа никако...“ додава истиот медиум.

„Адеми секој ден воодушевува се повеќе и повеќе во Максимир, никој не веруваше дека така ќе се врати на фудбалските терени, токму тој е вистински пакет за капитен, секако, и еден од вистинските лидери во соблекувалната. Но, постои начин и постои ред, а Адеми своите пет минути беше подготвен да ги сочека“ пишува „Гол“.