Категорија: Шпанија 11.06.2018 14:12
„Кралевите“ се уште се во потрага на нов тренер откако Зинедин Зидан на големо изненадување си поднесе оставка. Маурисио Покетино беше идентификуван како прва желба, но Реал се откажа поради комплексните и тешки преговори со Тотенхем, или поточно првиот човек Даниел Леви.
Јирген Клоп исто така беше споменат како сериозна опција, но и Германецот е недопирлив и Ливерпул не помислува да се раздели со стратегот. Масимо Алегри, Антонио Конте и Арсен Венгер беа дел од шекулациите на медиумите, а како алтернатива во последно време се почесто се споменува и името на Гути.
Според пишувањата на Диарио Гол, доколку поранешниот играч на Реал седне на тренерското столче, ќе има голема чистка на Сантијаго Бернабеу, а „клоца“ ќе добијат Кристијано Роналдо и уште неколку ѕвезди.
Според оваа сторија, Гути смета дека циклусот на ЦР7 во Реал е на самиот крај и една од неопходните промени на тимот е негово заминување. Тој не сака лидер на екипата да биде фудбалер кој треба да одмара многу често. Изборот на Гути за нова прва ѕвезда е Марко Асенсио, за кого верува дека има материјал да биде следниот освојувач на „Златната Топка“.
Гути нема да смета и на Карим Бензема, за кого во едно интервју рече: „доколку го свират Бензема на Бернабеу тогаш сигурно има причина за ова“.
Шпанецот исто така мисли дека одбројани се и деновите на Лука Модриќ, и потребно е што поскоро да се донесе замена за Хрватот кој ќе наполни 33 години во септември и во иднина нема да може да напаѓа и да помага во одбраната на секој натпревар.
Во плановите на Гути нема место ниту за Рафел Варан, кој знае да одигра еден натпревар добро, но да биде лош на следните три и да направи грешка во клучен момент. Тој не планира да му даде нови шанси за докажување на Французинот и доколку пристигне примамлива понуда, без двоумење ќе го продаде.
Под знак прашалник ќе биде ставена и иднината на Марсело, Навас и Бејл. Гути ќе бара замена за Бразилецот и веднаш штом пристигне нов играч, левиот бек ќе се пресели на клупата. Истото важи за Навас, Гути преферира ангажман на Давид де Хеа и Тибо Куртоа. Што се однесува пак до Герет Бејл, Реал е подготвен да го продаде доколку пристигне добра понуда, но доколку тоа не се случи, Гути верува дека може да го извади најдоброто од Велшанецот и да му ја врати кариерата на прав пат.
Колку е остварливо едно вакво сценарио останува да се види. Диарио гол е медиум познат по сензационални вести кои треба да се земат со голема доза на резерва.