Три натпревари се одиграа денеска, а љубителите на фудбалот имаа можност да проследат спектакуларен меч помеѓу Вест Хем и Хадерсфилд, екипа која сезонава ќе испадне од елитното друштво на Островот и ќе се врати во Чемпионшип дивизијата.

Вест Хем славеше со 4-3, иако гостите имаа водство од дури 1-3 во второто полувреме, а први до водство дојдоа токму Чеканите со голот на Ноубл од пенал во 15. минута.

Само две минути траеше радоста на домаќините откако Бакуња израмни на 1-1, а Ахерн-Грант во 30. минута донесе пресврт за Хадерсфилд од 1-2, а со тој резултат се замина на паузата.

Во второто полувреме истиот играч му донесе водство на гостинот и од 1-3, но и тоа не беше доволно ниту за бод за последно пласираната екипа на табелата во Премиерлигата.

Огбона во 75. минута намали на 2-3 и навести интересна завршница од пресметката во Лондон, во која вистински херој беше „златната резерва“ Чичарито, откако мексиканскиот напаѓач најпрво во 84. минута израмни на 3-3, за во судиското продолжение погоди и за конечни 4-3.

Од останатите натпревари, Борнмут и Њукасл ремизираа со 2-2, а Лестер беше подобар на гостувањето кај Барнли триумфирајќи со 1-2.

Утре се среќаваат Фулам – Ливерпул, како и Евертон – Челси.

Обложувај се онлајн, играј на BetAdria.com, регистрирај се ТУКА.