Луј ван Гал сакаше да го ангажира Садио Мане уште во август 2015, но Саутемптон одби да го продаде играчот и го натере да остане барем уште една сезона.

Следното лето „ѓаволите“ одново пројавија интерес, но Сенегалецот на крајот заврши во Ливерпул во трансфер вреден околу 34 милиони фунти.

„Да, точно е дека преговарав со Манчестер јунајтед. Бев навистина блиску до потпис со нив. Разговарав и со тренерот кој претходно беше таму (Ван Гал). Доставија понуда, но истата таа недела ми се јави Клоп. Ми рече, „Мислам дека ова е правиот клуб за тебе, правиот тренер, подобро ќе биде за тебе да се преселиш во Ливерпул“. Коцките некако се поклопија па си реков, одам во Ливерпул“ – открива Садио Мане во разговор со Мирор.

Фудбалерот одлично се снајде на Енфилд и со одличните партии дури го привлече вниманието на Зинедин Зидан и Реал Мадрид, но тој неодамна порача дека не е заинтересиран за заминување од Ливерпул.