Реал Мадрид веќе потроши преку 300 милиони евра за засилувања, но нема да запре тука и се очекува ова лето да одвои барем уште 150 милиони евра. Пол Погба е последното делче од сложувалката на Зинедин Зидан, a не се исклучува и бомба од типот на Килијан Мбапе со оглед на тоа дека се може да се случи до септември.

Во меѓувреме, „кралевите“ соопштија ангажман на уште едно име кое не е толку звучно како оние кои веќе пристигнаа. Се работи за талентираниот Такефуса Кубо, кој следната сезона ќе биде дел од Кастиља тимот.

Интересно е тоа што Јапонецот долго време беше дел од школата на Барселона, популарната Ла Масиа на која и се приклучи кога имаше 10 години, но беше еден од играчите поради кои „каталонците“ добија казна од ФИФА и забрана за трансфери па мораше да замине од Камп Ноу и да се врати во Јапонија.

Тој на 4. јуни наполни 18 години, па може да се врати во Европа без проблеми и Барселона му понуди прилика одново да го облече нивниот дрес. Интерес пројавија и клубови како Манчестер Сити, Баерн Минхен и ПСЖ, а Такефуса Кубо на крајот реши да го прифати предлогот на „кралевите“.

Такефуса Кубо се најавува како „јапонскиот Меси“ а според Реал Мадрид, се работи за еден од најперспективните млади играчи во светот, кој располага со одлична техника и вештини, голема визија за играта, одличен дриблинг и чувство за гол.