Категорија: Франција 17.07.2019 10:55
Нов момент во случајот Нејмар, „Мундо Депортиво“ тврди дека агентите на Нејмар почнале да стапуваат во контакт со други клубови. Почнати се разговори со Реал Мадрид, Јувентус, Баерн Минхен и Манчестер јунајтед.
Барселона веќе има страшна офанзива, па Нејмар не им е приоритет иако сакаат да го вратат на Камп Ноу. Тие играат на картата фудбалерот да го моли ПСЖ за заминување и францускиот клуб да одлучи за пониска цена да му даде дозвола да замине.
Но ПСЖ игра тврдо, сопствениците немаат намера да ја намалат цената за Нејмар и се револтирани од односот на Барселона. Преговорите меѓу двете страни одат тешко, и можеби нема да завршат со договор.
Реал Мадрид би бил атрактивна опција за Нејмар, Флорентино Перез отсекогаш сакал ѕвезди, а Бразилецот е една од најголемите.
Јувентус веќе има одличен преоден рок, италијанскиот шампион покажува моќ на трансфер пазарот. Кристијано Роналдо и Нејмар во ист тим би било интересно да се видат, но „старата дама“ сега плаќа 75 милиони евра за Де Лихт па тешко е за верување дека ќе посегне и по Бразилецот.
По заминувањето на Робен и Рибери, Баерн Минхен е во потрага по офанзивни фудбалери, веќе е извесно дека не успеаа да дојдат до услугите на Сане кој беше нивна прва желба. Нејмар е опција, но германското првенство е слично како и француското, со еден клуб помоќен од сите и од време на време ќе се појави конкуренција.
Манчестер јунајтед е опцијата која е најмалку реална. Ѓаволите не играат во Лигата на шампионите, а тоа влијае на одлуката на Нејмар. Бразилецот отсекогаш сакал да биде онаму каде што се најдобрите, а Јунајтед во моментов не е таму.
Нејмар му соопшти на ПСЖ дека не сака веќе да игра за нив, останува да видиме каде ќе биде неговата следна дестинација.