Португалецот во неделата дебитираше во студиото на Скај Спортс како стручен коментатор на натпреварите од Премиерлигата и веднаш ги разбранува страстите.

На прашањето за тоа кои се кандидатите за титулата, тој рече: „Манчестер Сити, Ливерпул, Тотнем и Манчестер Сити Б“.

Португалецот од сликата ги изостави Манчестер јунајтед, Челси и Арсенал, па многумина ваквата изјава ја протолкуваа како провокација за двата негови поранешниот клубови и „топчиите“.

Не е спорно дека „специјалниот“ знае да биде контроверзен, но ова што го кажа до некаде држи вода. Пеп Гвардиола на располагање има страшна група на играчи, и првиот тим горе-долу би бил следниов.

Првите 11 на „граѓаните“: Едерсон, Вокер, Лапорт, Стоунс, Зинченко, Фернандињо, Давид Силва, Бернардо Силва, Де Брујне, Стерлинг и Агуеро.

Доколку се креира состав од останатите играчи на кои смета Шпанецот, се добива прилично силен тим.

Вторите 11 на „граѓаните“: Браво, Канесело, Отамеди, Мангала, Менди, Родри, Гундоган, Фоуден, Марез, Сане и Жесус.

Во Манчестер Сити Б би играле трите најскапи засилувања во историјата на клубот, Кансело, Марез и Родри, а последната линија и голманот вреден преку 200 милиони евра (до душа Мангала денес потпиша со Валенсија, па сумата ќе падне за некој 40 милиони евра и на негово место ќе треба да влезе младиот Гарсија).