Во Франција известуваат дека тамошниот прволигаш Амиен бил жртва на хакерски напад, а станува збор за обид да се „украдат“ нивните 2 милиони евра од вкупно 12-те милиони евра кои ги заработија од трансферот на Тангју Ндомбеле во Тотнем ова лето. Проблемот се увидел откако хакерите почнале со операцијата по првичното префрлање на почетните 2 милиони евра од трансферот на Ндомбеле.

Младиот Французин беше доста посакуван фудбалер во европскиот трансфер пазар, а на крајот Тотнем и Лион се договорија за трансфер кој изнесуваше 60 милиони евра, дел од колачот му припаѓаше и на неговиот поранешен клуб Амиен.

На 3. август, додека Амиен го организирал пристигнувањето на Легањес од Шпанија за пријателскиот меч во рамките на претсезонските подготовки, внатрешниот сервис за е-поштата на клубот бил хакиран. Фактура од 600 илјади евра била пресретната и имало обид да се пренесат средствата на одредена сметка во Шпанија.

За среќа на Амиен, трансферот на средствата бил блокиран навремено, а откако било увидено за што се работи, се утврдило дека станува збор за планиран хакерски напад во два наврати, а истиот соодвествувал со трансферите на одредени фудбалери, а полицијата веќе води истрага за овој случај.