Во натпревар кој трите бода играа голема улога за тоа кој ќе оди на ЕП, Чешка го совлада Косово со 2-1 и се пласираше на континенталниот собир. Гостите на стартот од вториот дел поведоа преку Нухиу и најавија изненадување, но домаќините не дозволија нов пораз.

Крал прекрасно погоди од врвот на шеснаесетникот за 1-1 во 71. минута, за потоа да спушти топка на пет метри и со помош на Челустка да направи комлетен пресврт и да донесе настап на Европско првенство.

Резултатот значи дека Косово дефинитивно ќе биде противник на Македонија во март во баражот за ЕП преку Лига на нации.

На Вембли, инцидентот помеѓу Стерлинг и Гомез не остави никаков траг врз избраниците на Саутгејт кои со 7-0 ја совладаа Црна Гора. Окс го отвори резултатот во 11. минута, потоа Кејн постигна два гола за пет минути, а по половина час игра веќе беше 4-0 со голот на Рашфорд. Пред крајот на првиот дел Кејн стигна до хет-трик, а во продолжението од мечот, Софранац си ја затресе сопствената мрежа за 6-0, а Абрахам во 84. минута го постави конечниот резултат.

Франција добро се намачи со Молдавија и триумфираше со 2-1 во натпревар кој немаше никакво резултатско значење. Гостите поведоа по една грешка на Ленгле, Рата погоди за изненадувачка предност од 0-1. Варан изедначи на 1-1 во 35. минута, а на десет минути пред крајот, Жиру од пенал донесе победа.

Португалија забележа убедлива победа од 6-0 над Литванија во меч во кој Кристијано Роналдо стигна до 55-тиот хет-трик во кариерата. ЦР7 рано погоди од пенал за 1-0, потоа убаво пласираше од врвот на шеснаесетникот за 2-0. На стартот од вториот дел, Пици зголеми на 3-0 а Пасиенсија искористи една несигурност на голманот за 4-0. Бернардо Силва убаво се снајде ов 63. минута за 5-0, а 120 секунди подоцна му асистираше на Кристијано Роналдо за 6-0.

Србија со 3-2 го совлада Луксембург и остана во игра за второто место во групата, а Албанија пред своите фанови разочара против Андора и одигра 2-2.