Категорија: Лига Европа 28.11.2019 19:04
Манчестер јунајтед е веќе пласиран во нокаут рундата од Лига Европа па бодовите и не му се многу важни од последните две кола, затоа Солшер одлучи да настапи со значително млад состав на гостувањето кај Астана.
Со просечна старост од 22 години и 26 дена, ова беше најмладиот стартен тим на Манчестер јунајтед кој почнал еден европски натпревар. Просекот го крева голманот Ли Грант кој има 36 години.
Но и со таков тим Манчестер јунајтед поведе уште во десетата минута со погодок на Џеси Лингард.
Сепак во вториот дел домаќините со погодоци на Шомко и автогол и на Бернард направија комплетен пресврт и победија со 2-1.
Во другите два натпревари кои се играа од 17 часот, Краснодар го победи Базел со 1-0, а Хетафе со истиот резултат славеше на гостувањето кај Трабзонспор.