Категорија: Англија 14.01.2020 20:19
Контроверзниот фудбалски агент, Мино Рајола имал средба со браќата, а воедно и агенти на ѕвездата на Манчестер јунајтед, Маркус Рашфорд, околу можноста тој да ги претставува интересите на напаѓачот.
Во моментов претставници на Рашфорд се неговите браќа, Дејн и Двејн, кои воедно имаат и сопствена агенција чиј профил постојано расте во позитивна насока, меѓутоа Рајола има силна желба во себе да го запише Рашфорд во својот тефтер каде има неколку супер-ѕвезди.
Според пишувањата на „Д Атлетик“, Рајола веќе имал средба со двоецот околу можноста да го претставува 22 годишниот фудбалер, а Дејн и Двејн наводно се согласиле и да добиваат совети од Рајола.
Оваа вест доаѓа само една седмица откако Рајола го презеде Џеси Лингард како свој клиент, а се верува дека сево ова е стратегија на агентот да ги засили конекциите со англиските фудбалери, а најголема придобивка од сето тоа наводно гледа токму во Рашфорд.
Познато е дека Рајола за клиент го има и Пол Погба кој подолг период се шпекулира дека е на излезна врата од Манчестер јунајтед.