Категорија: Шпанија 21.01.2020 11:14
„Каталонците“ не планираа да пазарат во јануари, но повредата на Луис Суарез ги менува работите. Уругваецот ќе биде надвор од терените околу четири месеци и практично за него е завршена сезоната, па Кике Сетиен бара нов напаѓач за да се задржат високите апсирации и триумф во Ла Лига и Лигата на шампионите.
Новиот тренер на Барселона во понеделникот имал разговор со раководството на клубот и било договорено да се види што може да се направи во преостанатите десет дена од зимскиот преоден рок.
Според пишувањата на Мундо Депортиво, на листата со желби има неколку имиња а при врвот се наоѓаат Пјер Емерик Обамејанг од Арсенал и Родриго од Валенсија. Спорт пак пренесува дека Тимо Вернер од РБ Лајпциг е опција.
Проблем е што овие играчи чинат многу, а и нивните клубови тешко ќе сакаат да се разделат сред сезона.
Алтернатива е да се донесе напаѓач како Оливиер Жиру, Фернандо Љоренте и Криштоф Пјонтек, кои се на пазарот овој месец, но Барселона нема убави спомени од ваква зделка, минатата година беше ангажиран Кевин Принц Боатенг, кој се покажа како промашување.