Категорија: Англија 28.05.2020 19:23
„Тајмс“ наведува дека Ливерпул би можел да биде единствениот клуб во Премиерлигата, кој по продолжувањето на актуелната сезона, своите натпревари кои се предвидени да ги одигра на домашен терен, всушност да ги одигра на неутрален терен.
Денеска „Телеграф“ извести дека веќе е постигната согласност околу датумот кога би требало да продолжат фудбалските возбудувања на Островот, актуелната сезона може да продолжи на 17. јуни, поточно во среда, ден кога е предвидено да се одиграат два натпревари, односно Манчестер Сити – Арсенал, Астон Вила – Шефилд Јунајтед.
Информациите кои ги објави „Тајмс“ се базираат на стравувања од можни масовни собири на навивачите на Ливерпул, кои се во исчекување на првата титула на овој клуб во Премиерлигата по пауза од цели 30 години, а за тоа да се случи, на „Редсите“ им се потребни уште само две победи на девет кола до крајот.
Во меѓувреме, „Дејли мејл“ пренесе дека полицијата веќе ја известила Премиерлигата дека клубовите можат да ги играат натпреварите на своите домашни терени, меѓутоа навеле дека дерби пресметките би требало да се играат на неутрални терени.