Денеска во Нион, Дрита требаше да ги одмери силите со Линфилд во претквалификациите од Лигата на шампиони, но на два часа пред одигрување на мечот, стигна соопштение дека истиот е одложен.

УЕФА се решила на еден ваков чекор откако втор фудбалер на Дрита бил позитивен на коронавирус.

Пред да отпатуваат за Швајцарија, целиот тим на Дрита бил тестиран и резултатите биле негативни. Во петокот, биле направени нови тестови во пресрет на дуелот со Интер од Андора, и еден фудбалер бил позитивен. Тогаш било решено во изолација да оди само тој, и уште еден негов соиграч со кој имал близок контакт.

Во понеделникот била направена нова рунди тестови која донела уште еден позитивен случај. Новиот фудбалер кој е заразен со ковид-19 имал контакт со голем број на соиграчи, па здравствените власти на Швајцарија наредиле целиот тим да оди во карантин.

Случајот сега ќе биде предаден на дисциплинската комисија при УЕФА, а според пишувањата на медиумите, Дрита најверојатно ќе загуби со службени 3-0 и ќе биде прва жртва на новите правила на европската куќа на фудбалот.

Тренер на косовскиот шампион е Адријан Нухиу, а за овој тим настапуваат и тројца фудбалери од Македонија, Адријан Цуцули, Изаир Емини и Бунјамин Шабани.