Категорија: Франција 20.08.2020 12:24
Лион беше едно од пријатните изненадувања по ре-стартот на Лигата на шампиони, „лавовите“ го преживеаја гостувањето кај Јувентус и реваншот во осминафиналето, за потоа да го шокираат Манчестер Сити во четвртфиналето.
Клубот од Франција сепак не можеше ништо да стори против разиграниот Баерн Минхен и се збогуваше од најелитното европско натпреварување.
По елиминацијата, спортскиот директор Жунињо најави дека одредени фудбалери ќе бидат продадени, во прв план се младите ѕвезди Муса Дембеле и Усем Ауар.
„Одредени фудбалери ќе заминат, тоа е сигурно, но не сум загрижен. Кога имате играчи кои одиграа одлично во Лигата на шампиони, како Муса Дембеле и Усем Ауар...“ – вели Жунињо.
Муса Дембеле подолго време е следен од гигантите од Премиерлигата и се поврзува со Челси и Манчестер јунајтед. Усем Ауар пак е желба на Јувентус, Манчестер Сити и Барселона.
Жунињо не го спомна Мемфис Депај, но има гласини и за него. Се говори дека Холанѓанецот може да заврши во Борусија Дортмунд доколку „милионерите“ го продадат Џејдон Санчо на Манчестер јунајтед.