Тотнем се пласираше во плејфот од Лига Европа, но Шкендија пружи силен отпор. Во дел од мечот англискиот тим се мачеше, не им беше сеедно кога тетовци изедначија на 1-1. Мурињо требаше да ги внесе Кејн и Лукас за да дојдат до победата.

„Пандев пред некој ден ми кажа дека ќе победиме, но нема да ни биде лесно, така и излезе на крајот“, откри Жозе Мурињо на прес конференцијата после мечот.

„Убаво е кога ќе се победи на три меча по ред надвор од дома. Сон одигра одличен меч, не му беше лесно да игра како напаѓач, тоа не е негова позиција, но откако влезе Кејн се врати на своето место и тоа се покажа како клучно. Неговиот гол беше многу важен“.

„Почнавме добро, мислевме дека со голот на Ламела ќе го скршиме противникот, игравме добро од 41. минута, а потоа работите станаа малку комплицирани за нас. Ми се допадна како замените кои ги направивме го променија текот на мечот, како реагираше тимот“.

„Шкендија одигра одличен меч, тренерот добро си ја заврши работата. Се виде дека се добар тим“.