Категорија: Италија 16.10.2020 13:03
Пред три недели настана голем хаос во редовите на Џенова, имаше дури 22 случаи на коронавирус. Голманот Матија Перин беше првиот позитивен случај во тимот на нашиот Горан Пандев, а потоа настана голема зараза и дури 17 фудбалери закачија ковид-19.
Потоа се појавија и позитивни случаи во редовите на Наполи (Пјотр Зелински и Елиф Елмас) противникот на Џенова, не се одигра големото дерби помеѓу Јувентус и Наполи и се појавија многу прашалници за протоколите.
Во разговор со „Ла Република“, Матија Перин вели дека малку се знае за овој подмолен вирус, секој може да се зарази и како пример ги посочи Кристијано Роналдо и претседателот на САД, Доналд Трамп.
„На речиси една недела пред дуелот против Наполи, на 21. септември, отпатував во Торино да ги видам сопругата и децата. Тоа беше понеделник и спротивно на работите кои беа кажани, нема доказ дека тој ден сум се заразил со коронавирус“ – вели Матија Перин, кој ја победи болеста и сега е негативен.
„Во средата ни беа направени тестови, резултатот пристигна во четврток наутро и беше негативен. Но вечерта имав треска. Ова е подмолна болест, можете да се заразите во такси или кога го притиската копчето во ливтот. Во моето семејство сите беа негативни. Клиничката слика се менува за десетина часови, па и специјалистите не знаат се за ковид-19“.
„Да бидеме јасни, хаосот на дуелот помеѓу Јувентус и Наполи не се случи поради Џенова. Може да му се случи секому. Кристијано Роналдо е позитивен, Доналд Трамп е позитивен. Доколку клубот ни се викаше Реал Мадрид, Интер или Јувентус, ќе беше покажана поголема почит“.
Поради зголемениот број на случаи, медиумите шпекулираат дека се разгледува опцијата Серија А да креира „меур“ налик на оној во НБА.
„Разговараме во соблекувалната, никој од нас не е експерт за да знаеме што е најдобро, но мислам дека мора повеќе да се жртвуваме“.
„Млади сме, тренирани атлети и добро се справуваме со коронавирусот, но ова е грд, подмолен ѕвер. Ќе лажам доколку кажам дека не ме дестабилизираше малку“.
„Убеедн сум дека вирусот е креиран во лабораторија, и дека не се работи за трансмисија од животно“.