Категорија: Македонија 25.09.2017 15:08
По високиот пораз пред своја публика од Зенит (0-5), Вардарци во четврток гостуваат во Норвешка кај Розенборг, во второто коло од групата „Л“.
Европската куќа на фудбалот веќе ги одреди делителите на правдата за претстојните натпревари, а мечот во „Трондхеим“ ќе го суди 31 годишниот бугарски арбитар Георги Кабаков.
Од тоа што можеме да го забележиме, последниот меч за Кабаков бил оној помеѓу Евертон и Ружомберок, во квалификациите за Лига Европа, каде англискиот претставник пред своја публика забележа минимален триумф од 1-0, на истиот додели само два жолти картони, и двата за гостите.
Статистиката која се заснова на 28 интернационални натпревари на бугарскиот арбитар, вели дека тој покажал вкупно 145 жолти картони како опомени, а 10 пати испратил фудбалери предвреме во соблекувалната покажувајќи им црвени картони. Тоа значи дека статистички, Бугаринот доделува по пет опомени на натпревар, што не е баш скромна бројка.
Она што е исто така за идвојување, е фактот што бугарскиот судија не е баш „толерантен“ кон гостински екипи со оглед на тоа што има 19 жолти картони повеќе доделено во однос на домашните екипи.
Извор: worldreferee.com