„Црвено-црните“ денеска го играат третиот меч од своето историско учество во групната фаза од Лига Европа, противник е шпанскиот клуб, Реал Сосиедад.

Реал Сосиедад е една од најдобрите шпански екипи која оваа сезона игра особено офанзивен фудбал. Дава многу голови, но и прима. По седум одиграни кола во Примера е на седмото место со 19 дадени и 17 примени погодоци.

Во Лига Европа го демолираа Розенборг со 4-0, но потоа со 3-1 загубија на гостувањето кај Зенит. Во Скопје се фаворити и нивната цел е јасна, победа.

Но, триумф сака и Вардар, македонскиот шампион веќе почувствува што значи да се биде дел од големо европско првенство. Одигра лош меч против Зенит, но напредокот беше очигледен кај Розенборг иако и од таму се врати со пораз. За подигнување на самодовербата би требало да влијае и победата во дерби дуелот со Шкендија.

Доколку фудбалерите на Чеде Јаневски одиграат без страв, со фокус и дисциплина во тактиката која ќе ја добијат од тренерот, може да се надеваат на првите европски бодови во својата историја.

„Реал Сосиедад е тим кој доаѓа од едно од најсилните првенства, има тим за секоја почит. Тие и Зенит се главни фаворити за првите две места во групата. Имаат победа и пораз, па сигурно утре ќе сакаат да освојат нови три бода. Нашата форма е во нагорна линија, тоа го покажавме и против Розенборг, по триумфот со Шкендија видов дека имаме самодоверба и подготвени сме да ги освоиме првите бодови во групата“ - вели Чеде Јаневски.

„Добро го анализиравме противникот, гледавме натпревари и од Примера и од Лига Европа, мора да бидеме максимално фокусирани и дициплинирани доколку сакаме да ја оствариме целта и да дојдеме до трите бода. Тие се офанзивен тим кој игра со брзи додавања и оди на гол повеќе“.

За вечерашниот натпревар, Јаневски нема да може да смета на Муслиу, Брдаровски и Велковски, сите тројца се надвор од теренот поради повреди.

Денеска се очекува и повеќе публика во однос на натпреварот помеѓу Вардар и Зенит. Навивачите треба да создадат атмосфера која ќе ги понесе фудбалерите во битката против шпанскиот тим.