Се чини дека пукна тиквата помеѓу Икарди и Интер. „Нероаѕурите“ оваа недела решија да му ја одземат капитенската лента на напаѓачот, кој потоа одби да патува со тимот за гостувањето во Виена и дуелот со Рапид во Лига Европа.

Мауро Икарди наводно се жали на ситна повреда и е под голем знак прашалник за дуелот со Сампдорија во Серија А. Останува да се види дали двете страни ќе успеат да ги надминат недоразбирањата, но случувањата од изминатиот период укажуваат на „развод“ по крајот на сезоната.

Во екот на целиот хаос, денеска пристигна интересен сигнал од социјалните мрежи, капитенот на Јувентус, Џорџо Кјелини почна да го следи Мауро Икарди на Инстаграм.

Не е тајна дека „Бјанконерите“ посакуваат да го видат Аргентинецот во своите редови, самата Ванда Нара говореше за ваков трансфер во минатото а и спортскиот директор на Јувентус, Фабио Паратичи оваа недела потврди дека изминатото лето Мауро Икарди бил опција за нив се до моментот кога дознале дека можат да го купат Кристијано Роналдо.

Останува да се види каква ќе биде иднината на Мауро Икарди, напаѓачот има откупна клаузула од 110 милиони евра, која е активна во првите две недели од јули и важи само за клубовите надвор од Италија.