Првата ѕвезда на Атлетико Мадрид, Антоан Гризман нема никакви преговори или најмалку контакт со челниците на Барселона околу можен трансфер во таа екипа, тврди неговата сестра, а сево ова доаѓа откако познато е дека откупната клаузула на Французинот на лето ќе падне на 120 милиони евра.

Французинот често се поврзува со трансфер на Камп Ноу, така беше и претходно, но, тој се одлучи да стави потпис на нов договор со Јорганџиите ланското лето и да стави крај, барем за момент на разните шпекулации околу неговата иднина.

Веројатно елиминацијата на Атлетико Мадрид уште во осминафиналето од Лигата на шампионите донесе нови шпекулации за неговата иднина, а неговата сестра Мауд Гризман, тврди дека тој е целосно фокусиран на тимот од Мадрид во моментов, и ако постои некој клуб со кој тие се во постојани преговори, тоа е токму Атлетико Мадрид и никој друг.

„Антоан е разочаран поради елиминацијата, секако негова голема желба е во неговиот престој во клубот да стигне до трофејот од Лигата на шампионите“ рече Мауд за Л’Екип.

„Тој е едноставна личност, исто како и неговите соиграчи, тренерот, челниците на клубот и навивачите на истиот. Можеби заморно е да се читаат секојдневни нови шпекулации за него, околу тоа што тој мисли за понатаму и слично“ додаде таа.

„Единствениот човек кој во моментов се грижи за интересите на мојот брат овие две години сум јас, мојот татко, Алан и секако нашиот адвокат, Севан Кариан. Доколку постои клуб со кој сме во постојан контакт во моментов, тоа е Атлетико Мадрид и никој друг“ заклучи таа.