Категорија: Италија 14.10.2019 11:25
Поранешниот премиер на Италија по 31 година на чело на „росонерите“, во април 2017 го продаде Милан на конзорциум од Кина. И покрај тоа што уште тогаш се шпекулираше дека човекот кој го купува клубот, Ли Јонгхонг е сомнителен лик и дека не е толку богат колку што тврди дека е, зделката се реализираше и Силвио Берлускони инкасираше преку 700 милиони евра.
Ваквите гласини се покажаа како точни, Ли Јонгхонг за кратко време снема средства, доцнеше со исплатите па Милан се најде пред банкрот и премина во рацете на фондот Елиот, кој всушност го конфискуваше клубот откако бизнисменот од Кина не им ја врати позајмицата.
Фондот Елиот реши да направи реконструкција на Милан и да го врати клубот на стабилни нозе пред да го продаде, но работите не се одвиваат според планот, „росонерите“ разочараа минатата сезона, а лошо ја започнаа и новата што резултираше со тренерска промена по само седум кола.
Случувањата на Сан Сиро сега ги прокоментира Силвио Берлускони, кој соли памет и вели дека има решение за кризата.
„Како може Милан да се врати на славните патеки од минатото? Тоа е едноставно, но во исто време и тешко остварливо: дајте му го клубот одново на Силвио Берлускони“ – вели поранешниот премиер на Италија.
Тој имаше замерка и на коментарите на генералниот извршен директор Иван Газидис, кој побара поголема почит за Елиот со оглед на тоа дека фондот го спасил клубот од банкрот и преселба во Серија Д.
„Ова се фрази кои треба да бидат изговорени само кога некој ќе влезе во тоалет, и пред да каже вакво нешто, лицето треба да се погрижи вратата да биде затворена“.