Минатиот петок, еврпската куќа на фудбалот изрече жестока казна. Поради прекршување на правилата за Финансиски фер плеј, Манчестер Сити доби забрана за настап во Лигата на шампиони во сезоните 2020/21 и 2021/22, а ќе треба да плати и парична глоба од 30 милиони евра.

По пет дена молк, генералниот извршен директор на „граѓаните“, Феран Соријано седна на разговор со медиумскиот тим на клубот и одговори на прашања поврзани со казната која ја изрече УЕФА.

„Најважната работа што треба да се каже е дека обвинувањата се лажни, едноставно нема вистина во нив. Сопственикот нема инјектирано пари во клупската каса кои не се прикажани. Ние сме самоодржлив клуб, кој работи со профит, немаме долг, нашите сметки и извештаи беа чешлани безброј пати од страна на инспектори, ревизори, инвеститори и ова е перфектно јасно. Соработувавме во текот на целиот процес. Доставивме огромен број на документи и докази за да покажеме дека обвинувањата не се вистинити. Но на крајот, луѓето од УЕФА повеќе се наклонија на податоци извадени надвор од контекст од украдени мејлови и во втор план ги ставија доказите кои ние им ги презентиравме. Од сето она што ни се случуваше, имаме впечаток дека зад казнат има политичка позадина“ - вели Феран Соријано.

„Ќе доставиме жалба до Судот за спортска арбитража, сакаме што поскоро да се донесе пресуда преку фер процес. Се надевам дека процесот ќе финишира на почетокот од летото“.

„Разговаравме со Пеп, го информиравме за процесот но тој не треба да одговара на прашања поврзани со оваа тема. Тој е фокусиран на фудбалот, на следниот натпревар. Разговаравме и со играчите, тие се спокојни, фокусирани се на нивната работа, а тоа е да играат фудбал“.